भीम सिंह, गांव देहरा हटवाड़, जिला बिलासपुर, हिमाचल प्रदेश।
रहणा नी असां तुसां
रई जाणी नशानियां
जिंदगी च लिखी जाणी
सेह जे असां कहाणियां।
करोड़ां सालां ते जीवन चलया
अग्गे बी ये चलदा रहणा
तिसा गदिया जे अज तू बैठीरा
तिसा पर कल कुसी होरी बहणा।
न मांअ किछ नेयेणा इथ्था ते
न ई तू किछ नेयेणा
पूरी उमर सैह जे कठठा कितया
सब इथ्थी ई रहणा ।
कितणी पीढियां लुखी गई
असां बी इक दिन लुखी जाणा
किछ दिन याद आणे
फेरी सबी भूली जाणा।
जीऊंदेयां सबी अग्गे पीछे घूमणां
मरने ते बाअद कुसी नी पूछणां
कितणा कमाई जा कितणा रखी जा
तेरे जाणे बाअद सैह कुसी जो नी दूसणा ।
मतलबा री दुनिया सारी
चलदिया री जय-जयकार
कुस रे पीछे कुण गया
करी ले तू सोच-विचार।
तू नी रहणा तां बी चलणा
ईयांई ये सब संसार
प्रीत लगा सच्चे मालकां ने
हुई जाये जे किते बेड़ा पार।
